அஞ்சா நெஞ்சன் - அஞ்சன்!

ரிச்மண்டில் வாழும் வாணி, பவனிராம் கௌஷிக் தம்பதியினரின் மகன் அஞ்சன் கௌஷிக்  மார்ச் 2009ல் லூகேமியா, லிம்ஃபோமா சொசைட்டிக்கு நிதி திரட்டுவதற்காக வர்ஜினியா பீச் நகரில் நடக்கவிருக்கும் ஷாம்ராக் அரை மராத்தனில் கலந்து கொள்ளவிருக்கிறான்.

லுகேமியாவுடன் போராடும் தங்கைக்காக நிதி திரட்டாமல் அந்த நோயை எதிர்க்க இந்த நிதித்திரட்டலில் ஈடுபட்டிருக்கும் அவன் மனதிடம் என்னை வியக்க வைக்கிறது. அவனுக்கு இருக்கும் உறுதியில் சற்றாவது நமக்கும் தொற்றிக்கொள்ள உங்கள் அனைவரையும் அழைக்கிறேன் இதில் ஈடுகொள்ள. அஞ்சனுக்கு உங்கள் ஆதரவைத் தெரிவிக்க விரும்பினால், உடனே விரையுங்கள் இந்தத் தளத்திற்கு => http://www.tinyurl.com/anjank 

ஷார்லட்வில்லில் மருத்துவம் படிக்கும் அஞ்சனின்  இந்த அரிய சேவைக்கு எங்கள் வாழ்த்துக்கள்.

நீங்கள் இதுவரை எலும்பு மஞ்சை தானத்திற்கு பதிந்திராவிட்டால், உங்களுக்கு கூடிய விரைவில் ஒரு சந்தர்ப்பம். ஜனவரி 18ல் ரிச்மண்ட் ஹிந்து சென்டரில் நடக்கவிருக்கும் லட்சார்ச்சனையின் போது மாடியில் இலவச எலும்பு மஞ்சை பதிவு முகாம் நடக்கவிருக்கிறது.  மேல் விவரங்கள் இங்கே.

எது பெரிது

எந்த ஊனில் எந்தப் புற்றோ?

இந்தப் புற்றுநோயின் கொடுமை பெரிதா?

இத்தீங்கு வந்தவரின் துயரம் பெரிதா?

இந்நோயை வெல்ல முயன்ற பெவினின் உறுதி பெரிதா?

அவனுக்கு துணை நின்ற நண்பர்களின் நட்பு பெரிதா?

பலர் கண்களைத் திறந்த வினய்யின், சமீரின் சாதனை பெரிதா?

எட்டு வயது ஆதித்யாவை இழந்த பெற்றோரின் சோகம் பெரிதா?

எட்டு மாதம்கூட நிரம்பாமல் சென்ற பிரனவின் இழப்பு பெரிதா?

சிகிச்சை பெற்றுவரும் தாயைப் பிரிந்த இரு சிறார்களின் தவிப்பு பெரிதா?

மருத்துவமனையிலேயே குடியிருக்கும் இவர்தம் குடும்பத்தின் பொறுமை பெரிதா?

தந்தை தன்கூட ஏன் விளையாடவில்லை என்ற இரண்டு வயதின் குழப்பம் பெரிதா?

உடல்வலியை மீறி குழந்தையுடன் விளையாடும் தந்தையின் மன உறுதி பெரிதா?

குழந்தைகளுடனும் மருத்துவமனைக்கும் அல்லாடும் மனைவியின் மனதிடம் பெரிதா?

மகன் படும் இன்னலை பார்க்கும் வயதான தந்தையின் சகிப்பு பெரிதா?

இவர்க்கு உதவ முடியாமல் தவிக்கும் உற்றாரின் இயலாமை பெரிதா?

இந்நோயின் தீவிரம் உணரா மக்களின் உதாசீனம் பெரிதா?

இவர்க்கு பொருத்தம் தேட உழைக்கும் நண்பர் உழைப்பு பெரிதா?

பொருத்தம் கிடைத்தவுடன் அனைவரும் அடையும் மகிழ்ச்சி பெரிதா?

பொருள் வழங்கும் அறிமுகமற்ற மக்கள் மனித நேயம் பெரிதா?

இந்நோயை வெல்ல முயலும் ஆர்ம்ஸ்ட்ராங்கின் முயற்சி பெரிதா?

எண்ணற்ற மருத்துவர்களின் ஆராய்ச்சி பெரிதா?

இவ்வனைத்தையும்விட பெரிதாக வேண்டும்

இதன் தீர்வு கண்டுபிடிக்க நம் வைராக்யம்.

உயிர் காக்க உதவுங்கள்

ராஜேஷ் அவர்கள் பற்றி ஒரு கட்டுரையும், கவிதையும் எழுதி எண்ணாலான மிகச் சிறிய உதவியாக எனது வலைத்தளைத்தில் பதிந்திருக்கிறேன். வாருங்கள், வாசியுங்கள், ராஜேஷ் குடும்பத்தாருக்கு உதவிக் கரம் நீட்டுங்கள்.

http://vazhakkampol.blogspot.com/2008/02/blog-post_23.html

ராஜேஷுக்கு உதவுங்கள்!

என்னுடன் கல்லூரியில் படித்த ராஜேஷைப் பற்றி ஏற்கனவே எழுதியிருந்தேன். அவனுக்கு எலும்பு மஞ்சை(bonemarrow) யாரால் கொடுக்கமுடியும் என்ற தேடல் மும்முரமாக நடந்து வருகிறது. உங்களால் முடிந்தால் எலும்பு மஞ்சை தானம் செய்ய பதிந்து கொள்ளுங்கள். ராஜேஷுக்கு உதவ நண்பர்கள் சேர்ந்து ஒரு தளம் அமைத்திருக்கிறோம். (http://www.helprajesh.com).

ராஜேஷ் ஒரு நல்ல நண்பன், பரோபகாரி. அவனுக்கு தெரிந்தவர்களாகட்டும் சரி, தெரியாதவர்களாகட்டும் சரி - உதவி தேவைப்பட்டால் முதலில் போய் நிற்பான். அவனுடன் பெங்களுரில் சாயந்திர வேலைகளில் நம் பசியைக்கூட கவனிக்காமல் அவன் பரோபகார அலுவல்களில் நிறைய சுற்றியிருக்கிறேன்(அவனைத் திட்டிக்கொண்டே). அப்படிப்பட்டவனுக்கு இன்று புற்றுநோய். புற்றுநோய் ஏதோ அபூர்வமான மக்களுக்குத்தான் வரும் என்று நினைக்கவேண்டாம். ராஜேஷ் உங்களை மாதிரி ஒரு சாதாரணன். நிறைய சினிமா பார்த்துக்கொண்டு, கிரிக்கெட் விளையாடிக்கொண்டு, வகுப்பில் மேஜையே ஆடும்வரை காலை ஆட்டிக்கொண்டு திரிந்த ஒருவன். சென்ற ஆண்டு கீமோவில் ஆளே அடையாளம் தெரியாமல் ஆகி மீண்டு வந்தவனுக்கு மீண்டும் வந்திருக்கிறது புற்றுநோய்.

அதுவும் அவன் இரண்டாவது மகன் பிறக்கும்வேளையில் இவன் வேலூர் மருத்துவமனையில் சிகிச்சை பெற்றுக் கொண்டிருந்தான். என்ன கொடுமை!

ராஜேஷ் மாதிரி நிறைய இளைஞர்கள், குழந்தைகள் காத்திருக்கிறார்கள் எலும்பு மஞ்சை தானத்திற்காக. ஆகவே முதலில் பதிந்து கொள்ளுங்கள். ராஜேஷுக்கு பொருளுதவியும் நிறைய தேவைப்படுகிறது. உங்களால் முடிந்த நிதி உதவி செய்தால் நல்லது. பொருளுதவி செய்ய விவரத்துக்கு இங்கே செல்லுங்கள்.

புத்தாண்டு வாழ்த்துக்கள்

தமிழ் படிக்கும் நல்லுலகத்தினர்க்கு எமது புத்தாண்டு வாழ்த்துக்கள்!

சில நாட்களாக புது நெருப்புநரி பயன்படுத்தலாமே என்று கசியும் ஓரத்துக்கு(அதாங்க bleeding-edge) வந்து Firefox Beta 2 பதிவிறக்கிய பின் நமக்கு பழகிய பழைய எக்ஸ்டென்ஷன்கள்(தமிழ் கீ எழுதிய முகுந்தராஜ் & கோ வாழ்க) எதுவும் வேலை செய்யவில்லை. கை ஒடிந்த மாதிரி இருந்தேன். இப்போதுதான் புது நெருப்புநரியில் அவற்றை எப்படி வேலை செய்ய வைப்பது என்று படித்தேன். அதான் சூடாக ஒரு பதிவு. நம் பின்னூட்டம் இல்லையே என்று நிம்மதியாக இருந்த சதங்கா, முரளி அனைவருக்கும் எச்சரிக்கை!

புத்தாண்டு தினத்தன்று நாங்கள் நடத்திய எலும்பு மஞ்சை தானப்பதிவு அமோக வெற்றி. பாதி நாளிலேயே விண்ணப்பங்கள் தீர்ந்துபோனதால் கடையை மூடும்படியாகிவிட்டது. ராஜேஷுக்கு எலும்பு மஞ்சை தானம் யார் செய்ய முடியும் என்ற தேடல் மும்முரமாக நடந்துவருகிறது. அது என்ன எலும்பு மஞ்சை என்கிறீர்களா? இதோ படம் காட்டி விளக்குகிறேன் :-)



விண்ணப்பங்கள் தீர்ந்து போனதால் (நம் ஆள் பிடிக்கும் திறமைக்கு நாமே நிகர்) மீண்டும் ஜனவரி 13ம் நாள் வர்ஜினியா ஹிந்து மையத்திலேயே மதியம் தானப்பதிவு நடத்துகிறோம். பதிவு செய்வது மிக சுளுவு. அங்கே சந்திக்கலாம். மற்ற ஊரில்/நாட்டில் இருப்பவர்கள் அருகே எங்கே தானப்பதிவு நடக்கிறது என்று பார்த்து (helprajesh.com தளத்தில் வலப்பக்கம் சுட்டிகள் இருக்கின்றன) பதியுமாறு கேட்டுக்கொள்கிறேன்.

மறுபடியும் புத்தாண்டு வாழ்த்துக்கள். பொன்ஸிடம் இருந்து ஆரம்பித்த புத்தாண்டு வாழ்த்து மின்னஞ்சல் புயல்உங்களுக்கு வரவில்லை என்றால் நீங்கள் த்மிழ்பதிவுலகில் இன்னும் பெரிய/சின்ன ஆள் ஆகவில்லை! :) ஆகவே உங்களுக்கு அந்த மடல் வரவில்லையென்றால் பொன்ஸை ஒரு பிடி பிடியுங்கள். ஹி... ஹி... ஏற்கனவே நொந்து போயிருக்கும் பொன்ஸுக்கு ஏதோ நம்மளாலான உதவி!

உயிருக்கு போராடும் ராஜேஷ் ராமநாதன்

என்னுடன் கல்லூரியில் படித்த ராஜேஷ் ராமநாதன் இன்று லூகேமியாவுடன் போராடிக் கொண்டிருக்கிறான். வேலூர் சிஎம்சி மருத்துவமனையில் சென்ற வருடம் போராடி வென்றவன், இப்போது மீண்டும் போரைத் தொடர்ந்திருக்கிறான். முழு விவரங்களை இங்கே காண்க => http://www.helprajesh.com

இந்த Bone Marrow விஷயத்தில், போன் மாரோ(bone marrow) தானம் செய்ய நம் வர்க்கத்தினரால்தான் முடியும். நம் வர்க்கம் என்றால் தெற்காசிய மக்கள். ஆகவே எவ்வளவு பேர் bone marrow donor ஆக பதிவு செய்ய முடியுமோ,  ராஜேஷ் போன்றவர்களுக்கு உயிர் வாழ வாய்ப்புகள் அதிகமாகின்றன. ராஜேஷ் மாதிரி இன்னும் சில பேர் இருக்கிறார்கள். சிகாகோவில் ஆறு வாரங்களே நிரம்பிய பிரனவுக்கு தானம் செய்ய அவசரத் தேவை. 

நம் ரிச்மண்டில் வரும் புத்தாண்டு தினத்தன்று ஹிந்து மையத்தில் bone marrow donor registration நடக்கவிருக்கிறது. இதில் பதிய தேவையானதெல்லாம் ஒரு காகிதத்தை நிரப்புவதும், ஒரு குச்சியால் உங்கள் உள்கன்னத்தை தடவிக் கொடுப்பதும்தான். உங்களுக்கு ஒரு செலவும் இல்லை, பதிவு செய்ய ரத்தத்துளி தேவையில்லை.  ஒரு உயிரைக் காக்க தயாள குணம் மட்டுமே தேவை. 

உங்கள் ஊரிலும் மக்களை பதிவு செய்யலாம். சமார் நிறுவனம் தேவையான பொருட்களை இலவசமாக அனுப்புவார்கள்.விவரங்களுக்கு http://www.samarinfo.org. போன் மாரோ தானம் பற்றிய முழு விவரங்கள் சமார் தளத்தில் அமெரிக்க போன் மாரோ தளத்திலும்(http://www.marrow.org) காணலாம்.

இதைப் படிக்கும் அனைவரும் நீங்கள் பதிவது மட்டுமல்லாமல் உங்கள் குடும்பத்தினர், உறவினர், நண்பர்களையும் பதிவு செய்யவிக்க வேண்டும். உங்களால் முடிந்த நிதியுதவியும் செய்தால் நல்லது.