நாகேஷ் காலமானார்

நகைச்சுவை நடிகர் நாகேஷ் சென்னையில் இன்று காலமானார்.

திருவிளையாடல், எதிர்நீச்சல், நீர்க்குமிழி, காதலிக்க நேரமில்லை போன்ற படங்களில் அவரது கதாபாத்திரங்களினால் நம் அனைவரையும் மகிழ்வித்த நாகேஷ் தமிழ் திரையுலகின் ஒப்பற்ற நகைச்சுவை நடிகர்.

ஒரு காலத்தில் நாகேஷ் திரையில் தோன்றினாலே அரங்கம் சிரிப்பில் வெடிக்கும். நகைச்சுவை பாத்திரங்களிலும் குணச்சித்திர பாத்திரங்களிலும் அவர் நடிப்புக்கு இணை அவர்தான். யதார்த்தமான நடிப்பு தமிழில் அவர்தான் ஆரம்பித்து வைத்தார் எனலாம்.

அவருடைய படங்களில் எனக்கு மிகவும் பிடித்தது பொம்மலாட்டம், காதலிக்க நேரமில்லை, நீர்க்குமிழி, ... பட்டியல் நீண்டுகொண்டே போகும்...

நாகேஷின் ஆன்மா சாந்தி அடைய என் பிரார்த்தனைகள்.

நமது ரிச்மண்ட் தமிழ் சங்கத்தில் அடுத்த கலைவிழா

பொங்கல், குடியரசு தினம் மற்றும் காதலர் தின விழா இம்மூன்றையும் ஒரு சேரக் கொண்டாட நமது சங்கத்தின் நிர்வாகக் குழுவினர் அனைவரும் ஒரு மனதாக முடிவு செய்து வரும் பிப்ரவரி மாதம், 28ம் தேதி மாலை 4 மணி முதல் 7 மணி வரை நமது ரிச்மண்ட் கோவிலில் (ஹிந்து சென்டரில்) ஒரு கலாச்சார விழாவினை நடத்த இருக்கிறோம். பல கலை நிகழ்ச்சிகளுக்கான விண்ணப்பங்கள் வந்துள்ளன. அவற்றை பரிசீலித்து பட்டியலிடும் பணியில் கலாச்சாரக் குழு தங்களை ஈடு படுத்திக் கொண்டுள்ளார்கள்.

ஒரு கலை நிகழ்ச்சி முடிந்து அடுத்த கலைநிகழ்ச்சி துவங்கும் முன்பு இருக்கும் இடைவெளிகளின் ஊடே சிறுவர் சிறுமிகள் தங்களுக்குத் தெரிந்த ஒரு திருக்குறளைச் சொல்ல (முடிந்தால் அதற்கு விளக்கமும் சொல்ல) ஒரு வாய்ப்பை ஏற்படுத்தியிருக்கிறோம். திருக்குறள் சொல்லும் (முடிந்தால் விளக்கமும் சொல்லும்) ஒவ்வொரு சிறுவர் சிறுமிக்கும் ஒரு சிறிய பரிசும் உண்டு. இந்தப் பங்கேற்பு முக்கிய கலைநிகழ்ச்சியின் எண்ணிக்கையில் சேராது எனவே, உங்கள் குழந்தைகள் எவ்வளவு திருக்குறள் சொல்ல விழைந்தாலும் அவர்களுக்கு வாய்ப்பு அளிக்கப் படும்.

நிகழ்ச்சியில் பங்கேற்க அல்லது மேலும் விவரம் வேண்டுவோர் நமது சங்கத்தின் நிர்வாகக் குழுவினரை நேரடியாகத் தொடர்பு கொள்ளவும்.

வாருங்கள் எல்லோரும் வடம் பிடிப்போம், வரலாற்றில் ஓர் இடம் பிடிப்போம்.


அன்புடன்

ரிச்மண்ட் தமிழ் சங்கம்

அட்றா அட்றா நாக்க முக்க நாக்க முக்க...

புதிய செயற்குழு மும்முரமாக அடுத்த நிகழ்ச்சியை - அவர்களின் முதல் நிகழ்ச்சியை தயார் செய்வதாக செய்தி பரவுகிறது. அதற்கு முன்னோடியாக சென்ற விழாவிலிருந்து ஒரு வீடியோ ( no pressure :-)

கோல்டன் க்ளோப்!

நேற்று நடந்த 66வது 'கோல்டன் க்ளோப்!' விருது வழங்கும் நிகழ்ச்சியில் தமிழ் இசையமைப்பாளர் ஏ.ஆர்.ரஹ்மான் 'ஸ்லம்டாக் மில்லினியர்' (Slumdog Millionaire) என்ற படத்தில் மிகச் சிறந்த இசையமைப்பிற்கான (Best Original Music Score) கோல்டன் க்ளோப் விருதைப் பெற்றார்!!


இதன் மூலம் 'கோல்டன் க்ளோப்!' விருதைப் பெற்ற முதல் இந்திய சினிமா இசைக் கலைஞர் என்ற மிக உயரிய சிறப்பைப் பெறுகிறார் ஏ.ஆர்.ரஹ்மான்! 'ஸ்லம்டாக் மில்லினியர்' மேலும் சிறந்த திரைக்கதை, இயக்கம், படம் என 3 விருதுகளை (Best Screenplay, Best Director, Best Film awards) வென்றுள்ளது குறிப்பிடத்தக்கது!

சர்வதேச அளவில் சினிமாத் துறையினருக்கு வழங்கப்படும் விருதுகளில், ஆஸ்காருக்கு அடுத்தாக மிக உயரிய விருதாகக் கருதப்படுவதே கோல்டன் குளோப் விருது!

அடுத்து ஆஸ்கார் விருது கிடைத்திட வாழ்த்துக்கள் ஏ.ஆர்.ரஹ்மான்!!

அஞ்சா நெஞ்சன் - அஞ்சன்!

ரிச்மண்டில் வாழும் வாணி, பவனிராம் கௌஷிக் தம்பதியினரின் மகன் அஞ்சன் கௌஷிக்  மார்ச் 2009ல் லூகேமியா, லிம்ஃபோமா சொசைட்டிக்கு நிதி திரட்டுவதற்காக வர்ஜினியா பீச் நகரில் நடக்கவிருக்கும் ஷாம்ராக் அரை மராத்தனில் கலந்து கொள்ளவிருக்கிறான்.

லுகேமியாவுடன் போராடும் தங்கைக்காக நிதி திரட்டாமல் அந்த நோயை எதிர்க்க இந்த நிதித்திரட்டலில் ஈடுபட்டிருக்கும் அவன் மனதிடம் என்னை வியக்க வைக்கிறது. அவனுக்கு இருக்கும் உறுதியில் சற்றாவது நமக்கும் தொற்றிக்கொள்ள உங்கள் அனைவரையும் அழைக்கிறேன் இதில் ஈடுகொள்ள. அஞ்சனுக்கு உங்கள் ஆதரவைத் தெரிவிக்க விரும்பினால், உடனே விரையுங்கள் இந்தத் தளத்திற்கு => http://www.tinyurl.com/anjank 

ஷார்லட்வில்லில் மருத்துவம் படிக்கும் அஞ்சனின்  இந்த அரிய சேவைக்கு எங்கள் வாழ்த்துக்கள்.

நீங்கள் இதுவரை எலும்பு மஞ்சை தானத்திற்கு பதிந்திராவிட்டால், உங்களுக்கு கூடிய விரைவில் ஒரு சந்தர்ப்பம். ஜனவரி 18ல் ரிச்மண்ட் ஹிந்து சென்டரில் நடக்கவிருக்கும் லட்சார்ச்சனையின் போது மாடியில் இலவச எலும்பு மஞ்சை பதிவு முகாம் நடக்கவிருக்கிறது.  மேல் விவரங்கள் இங்கே.

மாநில ரோபாட்டிக்ஸ் போட்டியில் வெற்றி!

சென்ற டிசம்பர் 6-7 தேதிகளில் ஹாரிஸன்பர்க்'கில் நடந்த வர்ஜினியா/வாஷிங்டன் பகுதி லெகோ ரோபாட்டிக்ஸ் இறுதிப் போட்டியில் கார்த்திக் செட்டியின் அணி வெற்றி வாகை சூடியிருக்கிறது. கார்த்திக் படத்தில் இடது பக்கம் நிற்கிறான்.

மூடி நடுநிலைப் பள்ளியில் எட்டாம் வகுப்பு படிக்கும் கார்த்திக்கையும் சேர்த்து எழுவரைக் கொண்ட இந்த அணி வர்ஜினியா மற்றும் வாஷிங்டன் டிசியில் இருந்த பல அணிகளுடன் மோதி இரண்டாம் டிவிஷன் பிரிவில்(12-14 வயதிற்குட்பட்டோர்) சாம்பியன் பட்டத்தை தட்டிச் சென்றது.

அடுத்ததாக இவர்கள் வர்ஜினியா/டிசி தரப்பில் அமெரிக்க அணியாக ஏப்ரலில் அட்லாண்டாவில் நடக்கவிருக்கும் உலகப் போட்டியில் பங்கேற்கவிருக்கிறார்கள். அந்த போட்டியிலும் அசத்த கார்த்திக் மற்றும் குழுவினருக்கு நமது வாழ்த்துக்கள்!

உமா, அசோக் செட்டி தம்பதியினருக்கும் தம்பி அஷ்வினுக்கும் எமது வாழ்த்துக்கள்.

லெகோ ரோபாட்டிக்ஸ் போட்டியில் வெற்றி பெறுவது கார்த்திக்கிற்கு புதிதல்ல! சென்ற வருடமும் மாநிலப் போட்டியில் வெற்றி பெற்றான். உலக சாம்பியனாக ஏப்ரலில் வர வாழ்த்துக்கள்.

படம் பாரு கடி கேளு - 24

சே! இந்த கம்பனி டெலிவரிமேன் வேலை ரொம்ப மோசம்பா. பெட்ரோல் விலை கட்டுப்படி ஆகலே ட்ரக்குக்கு பதிலா சைக்கிள் வெச்சு அட்ஜஸ்ட் பண்ணிக்கோ அப்படீன்றான் அந்த படுபாவி மேனேஜர்.

படம் பாரு கடி கேளு - 23

சே! நான் கஷ்டப்பட்டு ஏதோ "பீ பீ"ன்னு வாசிச்சா, ஒரு கும்பலே சேர்ந்திடுச்சு இங்கே! கத்ரி கோபால்நாத் வாசிச்ச "டூயட்" பாட்டு வாசின்னுவேறு படுத்தறாங்க! தாங்கமுடியலப்பா இவங்க பாடு.

படம் பாரு கடி கேளு - 22

நான் "இன்க்ரிமின்" டானிக் அப்படியே சாப்பிடுவேன். ஒரு நாளைக்கு 40 தடவை சாப்பிடுவேன். ஆனா என் பெண்சாதி மட்டும் சாப்பிடலே!

எழுச்சியூட்டிய மனிதர் - 2008

இந்த வருடத்தின் (2008) எல்லோரையும் மிகவும் கவர்ந்த எழுச்சியூட்டிய மனிதராக சமீபத்தில் மறைந்த பேராசிரியர் ரேண்டி பாச்'ஐ தேர்ந்தேடுத்துள்ளனர்.

பரிந்துரைக்கு வந்த பல பெயர்களிலிருந்து, சிறந்த 10 மனிதர்கள் தேர்ந்தெடுக்கப்பட்டு பின்னர் அதிலிருந்து மூவர் (ஸ்டிவென் சாப்மேன் , சாரணர் சிறுவர்கள் மற்றும் பேராசிரியர் ரேண்டி பாச்) இறுதி சுற்றிற்கு தேர்வு செய்தனர். இறுதியில் எல்லோரையும் மிகவும் கவர்ந்த மனிதராக ரேண்டி பாச்'ஐ தேர்ந்தேடுத்துள்ளனர்.

இவரை நம்மில் பலருக்கும் நன்கு தெரிந்திருக்கலாம். இவர் பான்கிரியாடிக் கேன்சரால் தாக்கப்பட்டு தன் மரணத்திற்கு நாள் குறித்த பின் வழங்கிய "இறுதி சொற்பொழிவு" ("The Last Lecture") நம் வாழ்வின் ஒவ்வொரு நாளையும் முழு நிறைவுடன் வாழவும், கனவுகளையும், லட்சியங்களை அடையவும் மிகவும் ஊக்குவித்தது என்பது மிகையல்ல. இந்த சொற்பொழிவினை கேட்டால்/பார்த்தால்/படித்தால் அதை நீங்களும் ஆமோதிப்பீர்கள் என்பது உறுதி. இவரைப் பற்றி படித்தவுடன் எனக்கு நினைவிற்கு வந்தது வள்ளுவனின் இந்த குறள்!

எண்ணிய எண்ணியாங் கெய்துப எண்ணியார்

திண்ணிய ராகப் பெறின்

இந்த சொற்பொழிவு முதலில் கார்நகி மெல்லன் பல்கலைகழகத்தில் மிகச் சிறிய கூட்டத்தில் வழங்கப்பட்டாலும், ஊடகம் வாயிலாக உலகெங்கும் பிரசித்தி பெற்றது! இதுவரை அவரது சொற்பொழிவுகளை 20 மில்லியன் மக்கள் பார்த்துள்ளனர் என்பது இதன் தாக்கத்திற்கு சான்று!

"நம் கையில் வந்த சீட்டு அட்டைகளை நம்மால் தேர்ந்தெடுக்க முடியாது.. ஆனால் அதை வைத்து எப்படி ஆடி வெற்றி பெறலாம் என்பது நம் கையில் தான் உள்ளது!" என்று அவர் சொன்ன கருத்தின் தாக்கம், ஜுலை 2008ல் அவர் மறைவிற்கு பின்னும் இருப்பது இவரது வலைதளத்தின் பின்னூட்டங்களில் கண்கூடாக தெரிகிறது.

இந்த வருடத்தின் முன்மொழியப்பட்ட மற்றவர்களும் ஒவ்வொரு வகையில் மக்களை கவர்ந்துள்ளனர். அதிலிருந்து சிலர்:

பால் நுமன் : அமெரிக்கர்களுக்கு மிக பிடித்த நடிகர், இயக்குனர், அகாடமி விருது வாங்கியவர், நல்ல சமுக தொண்டாளர். 2008 வரை அவர் வழங்கிய கொடை மட்டும் $250 மில்லியன் டாலர்கள்! இவரும் 2008'ல் மறைந்துவிட்டார்.

கிரிஸ்டீனா ஆப்பிள்கேட் : இந்நாள் திரைப்படம் மற்றும் தொலைகாட்சி நடிகை. 2008 ஆகஸ்ட்'ல் மார்பக புற்றுநோய்க்காக இரட்டை மாச்டெக்டொமி (மார்பக அகற்றல்) செய்த பின் தற்போது நலமாக இருப்பதுடன், மார்பக புற்றுநோயுடன் போராடும் அமெரிக்க பெண்களுக்கு மிக்க ஆதரவும், ஊக்கமும் அளித்தவர். இன்னமும் சினிமா/தொலைக்காட்சி சிட்காம்களில் நடித்துக் கொண்டிருக்கிறார்!!

டாரா டொரெஸ் : இவர் ஒலிம்பிக்ஸ் நீச்சல் போட்டிகளில் கலந்து கொண்ட மிக வயதான (41 வருடம், 125 நாட்கள்) வீராங்கனை என்ற பெருமையுடன், 2008ல் 50 மீட்டர் freestyle, 4×100 'medley relay' மற்றும் 4×100 freestyle relay' போட்டிகளில் 3 வெள்ளி பதக்கம் அள்ளியவர்! சாதிப்பதற்கு வயது ஒரு தடையல்ல என ஊக்கம் அளித்தவர்!

வில்லியம் கிப்சன்: போரில் குண்டடிபட்டு ஒரு காலை இழந்த பின்னும், செயற்கை கால் பொருத்தப்பட்டு மீண்டும் அமெரிக்க ராணுவத்தில் சேர்ந்தவர்.

டாக்டர் ஹலிமா பஷிர்: சுடான் நாட்டில் டார்ஃப்ர் பகுதியில் நடக்கும் இனப் படுகொலைகளுக்கு எதிராகவும், சிறுமிகள் நாசப்படுத்தப் படுவதை தடுக்கவும், தன் உயிரை பொருட்படுத்தாமல் போராடும் பெண். சமீபத்தில் இவரை வெள்ளை மாளிகையில் அதிபர் புஷ் சந்தித்து அங்கு நடக்கும் அவலங்களை பற்றி பேசினார்! இவர் எழுதிய "Tears of the Desert" என்ற புத்தகத்தை பற்றி அதிபர் மிக பெருமையாக குறுப்பிட்டார்!

டாரின் ஹெட்ரிக்: கன்சாஸ் மாகாணத்தின் க்ரீன்ஸ்பர்க் என்ற குக்கிராமத்திலுள்ள பள்ளியின் மேலாளர், புயலால் தாக்கப்பட்டு அனைத்தும் இழந்த தங்கள் ஊரில் "பசுமை" பள்ளிகளை நிறுவ உதவி புரிந்து மக்களை மீண்டும் அந்த ஊருக்கு திரும்ப வர வைத்தவர்!

டாக்டர் ஜில் போல்ட் டெய்லர்: மூளை ஆராய்ச்சியாளர்; மிக அரிய மூளைத் தாக்குதலிலிருந்து மீண்டு வந்ததுடன் அதைப்பற்றிய அனுபவங்களை சொற்பொழிவாற்றியவர்.

சாரணர் சிறுவர்கள்:: ஐயோவா மாகாணத்தில் பல்வேறு இடங்களிலிருந்து "தலைமை வகித்தல்" பயிற்சிக்காக வந்த சாரணர் தங்கியிருந்த முகாமினை சுழல் காற்று (Tornado) தாக்கியது. அவர்கள் பதற்றமடையாமல், தயார் நிலை பயிற்சியை நினைவிற்கொண்டு தங்களை காத்துக்கொண்டதுடன், மற்ற மாணவர்களையும் காத்து, பாதிக்கப்பட்டவர்களுக்கு முதலுதவி செய்தனர்!

ஸ்டிவென் சாப்மேன்: கிருத்துவ பாடகரான ஸ்டிவென் சாப்மேனின் தத்தெடுத்தல் பிரச்சாரத்தினால் கவரப்பட்டு, அதன் தாக்கத்தினால் பல சீன அனாதை குழந்தைகள் மக்கள் அமெரிக்காவில் தத்தெடுக்கப்பட்டனர். தான் தத்தெடுத்த மகளை ஒரு விபத்தில் இழந்தும், குடும்பத்தில் அனைவரையும் தேற்றி முன் சென்ற தீரம், மற்ற துன்பப்படும் பெற்றோரின் மனதினில் நம்பிக்கை வளர்த்தது!

நம்ம நாட்டிலிருந்தும் இது போல வருடா வருடம் மக்களுக்கு அறிமுகமில்லாத ஊக்கமூட்டிய மனிதர்களை பத்திரிக்கைகள்/ஊடகங்கள் சிறப்பித்தால்,

மக்களிடையே நன்னெறியும், நற்பண்பும், தொண்டாற்றும் ஆர்வமும் வளரும் என்பது என் கருத்து! ('டைம்' சஞ்சிகை இது போல இந்திய மக்களை கவர்ந்த மனிதர்களை அறிமுகம் செய்துவருகிறது!)

பேராசிரியர் ரேண்டி பாச்'ன் பிற சொற்பொழிவு விடியோக்கள்:

இறுதி சொற்பொழிவு (Last Lecture) - http://www.cmu.edu/uls/journeys/randy-pausch/index.html அல்லது http:\\www.thelastlecture.com

நேர மேலாண்மை (Time Management): http://video.google.com/videoplay?docid=-5784740380335567758

அவர் எழுதிய ப்ளாக் (Blog Journal): http://download.srv.cs.cmu.edu/~pausch/news/index.html

அவர் எழுதிய "An Injured Lion Still Wants to Roar" - http://www.beliefnet.com/Inspiration/Most-Inspiring-2008/Last-Lecture.aspx